Віншуем з Днём нараджэння Улога Е.Г.
Жамчужына Дзятлаўшчыны
Багата дзятлаўская зямля на добрых, спагадлівых і адданых працы людзей. Адны з іх тут нарадзіліся, а другіх прывёў лёс. Заўсёды замірае сэрца, калі сустракаеш таленавітага, шчырага чалавека, з адкрытай душой, ясным позіркам. І няма межаў тады твайму захапленню і радасці, што гэта сустрэча здарылася менавіта на тваім жыццёвым шляху. Такім чалавекам стала для нас Улога Еўдакія Рыгораўна. Сёлета Еўдакія Рыгораўна адзначыла 95-годдзе з дня нараджэння.
Нарадзілася гэтая цудоўная жанчына на Магілёўшчыне ў вёсцы Охар Чэрыкаўскага раёна. З дзяцінства выхоўвалася яна бацькамі працалюбівай, адказнай, самааданай справе, мела пытлівы розум і любіла чытаць кнігі. Яшчэ ў дзіцячым узросце ў Еўдакіі Рыгораўны з’явілася мара – атрымаць прафесію настаўніка і прысвяціць сваё жыццё самай ганаровай і патрэбнай прафесіі на зямлі. Пасля заканчэння школы яна паступае ў Крычаўскае педагагічнае вучылішча і вырашае стаць настаўніцай пачатковых класаў. Як і зараз гэта было прызванне чалавека, таму што патрабуе шмат часу, старання і сіл, асаблівага складу душы.
На Дзятлаўшчыну Еўдакія Рыгораўна прыязджае працаваць маладым спецыялістам у 1947 годзе. Працоўны дэбют адбыўся ў Алёхнавіцкай пачатковай школе, затым працуе загадчыцай Баравіцкай пачатковай школы, настаўніцай пачатковых класаў у Норцавіцкай сямігодцы, СШ №1 г. Дзятлава, Нагародавіцкай сямігодцы, Жыбартоўскай сярэдняй школе. Тут яна сустрэла свайго будучага мужа – Улога Аляксандра Трыфанавіча, стала маці. І заўсёды імкнулася быць лідарам, адказна падыходзіла да даручанай справы. Калі Жыбартоўская сярэдняя школа была закрыта, Еўдакія Рыгораўна пераходзіць працаваць у Хвінявіцкую сярэднюю школу, у якой працавала да выхаду на заслужаны адпачынак. Стаж працы настаўнікам пачатковых класаў склаў 44 гады. Плённай была яе працоўная дзейнасць аб чым сведчаць заслужаныя ўзнагароды: Ганаровыя граматы, Падзячныя лісты, медалі “Выдатнік народнай адукацыі”, “Ветэран працы”. Настаўнік славіцца сваімі вучнямі, а ў Еўдакіі Рыгораўны іх нямала. Яны яе гонар і надзеі, якім наканавана спраўдзіцца.
У памяці калег Улога Еўдакія Рыгораўна застаецца заўсёды як граматны, творчы, ініцыятыўны настаўнік-наватар. Падчас працы яна мела высокі ўзровень тэарэтычнай і метадычнай падрыхтоўкі. Яе ўрокі выдзяляліся разнастайнасцю па форме і змесце, адрозніваліся высокай прадуктыўнасцю. Настаўніца заўсёды знаходзілася ў пошуку, каб вучэбны матэрыял быў даступным і цікавым для ўсіх дзяцей. Еўдакія Рыгораўна на працягу многіх гадоў з’яўлялася кіраўніком гуртка “Умелыя рукі”. Яе работы дэманстрыраваліся на выставах абласнога і рэспубліканскага ўзроўнях.
Пасля выхаду на заслужаны адпачынак Улога Еўдакія Рыгораўна з’яўляецца пастаянным ганаровым госцем усіх школьных мерапрыемстваў. Падчас сустрэч дзеліцца сваім вопытам работы з педагогамі ўстановы адукацыі. Для навучэнцаў і іх бацькоў яна добры дарадца па пытаннях выхавання, так як мае быгаты жыццёвы вопыт.
Еўдакія Рыгораўна ніколі не была раўнадушнай да таго, што адбываецца ў грамадстве, краіне. Яна з’яўляецца актыўным наведвальнікам сельскай бібліятэкі. Любіць чытаць газеты і часопісы, мастацкую і навукова-папулярную літаратуру. Гэта ўнікальная жанчына валодае фенамінальнай памяццю і творчай натурай. Яна сама піша вершы і з задавальненнем чытае іх перад аўдыторыяй. Робіць гэта з асаблівай цеплынёй, бо ўсё, што пакладзена ў аснову твора, перажыта ёй асабіста.
Хіба гэта не шчасце сустрэць такога чалавека ў сваім жыцці, вучыцца ў яго быць прафесіяналам у сваёй працы, жыццёвай мудрасці?!
Моцнага здароўя, шчасця, мірнага неба над галавой жадаем Вам, паважаная Еўдакія Рыгораўна.
