Подзвіг вялікі і велічны

Дата: 19 апреля 2019 в 19:21, Обновлено 21 апреля 2019 в 19:33

Автор: Будевич Ж. М.

186 просмотров

Самае жахлівае на зямлі — вайна. Вясной ці восенню, зімой ці летам, доўгая або кароткая, вайна заўсёды складалася з агню, разбурэнняў і смерці. Вайна заўсёды пакідала пасля сябе знішчаныя хлебныя нівы, кроў і слёзы людскія, спаленыя гарады і вёскі, мела заўсёды аднолькавы чорны, як сажа, колер — колер бяды. З кожным годам аддаляецца час тых трагічных падзей 40-х гадоў мінулага стагоддзя, з кожным годам усё менш застаецца удзельнікаў і сведкаў Вялікай Айчыннай вайны.

У гэтым годзе мы будзем адзначаць 75 гадоў з дня вызвалення Беларусі ад нямецка-фашысцкіх захопнікаў. З гэтай нагоды ў нашай установе адукацыі — Хвінявіцкім дзіцячым садзе-сярэдняй школе —праводзіцца шэраг цікавых спраў. Бібліятэкарам установы, Цілігузавай М.М., была арганізавана выстава кніг “Подзвіг вялікі і велічны”. Яна прэзентавала выданні пра Вялікую Айчынную вайну навучэнцам VI-XI класаў.

Асабліва зацікавіла прысутных кніга — “Памяць Беларусі 1941-1945”, у якой змяшчаецца агульны нарыс пра падзеі вайны на тэрыторыі Беларусі, даецца падрабязная інфармацыя пра найбольш значныя баі на тэрыторыі кожнага раёна рэспублікі. У кнізе апублікаваны лічбы і прозвішчы воінаў і партызан, якія загінулі, колькасць загінуўшых падпольшчыкаў і мірных жыхароў — ахвяр фашысцкага тэрору. Кніга для дзяцей сярэдняга і старэйшага ўзросту цікавая і каштоўная. У кнізе “Беларусь у Вялікай Айчыннай вайне 1941-1945: дзень за днём” прыводзяцца асноўныя хранаметрычныя звесткі аб падзеях ваеннага часу. У “Кнізе герояў Гродзенскай вобласці” змешчаны звесткі аб лёсе людзей, імёны якіх назаўсёды запісаны ў летапіс мужнасці, перад якімі схіляецца ўсё чалавецтва. Зборнік “Мастацтва ў баявым страі” прапаноўвае чытачам песні ваенных гадоў, публіцыстычныя нарысы, а таксама ўспаміны і эсэ сведкаў падзей таго часу. Асобная паліца выставы прысвечана творчасці беларускіх пісьменнікаў на тэму вайна. Гэта кнігі В.Быкава, А.Адамовіча, І.Навуменкі, І.Сяркова, У.Карповіча.

           Зноў гісторыя ствараецца,
           Уся ў апёках, і ўся — у дыме.
           Усё праходзіць — народ застаецца.
           Усё, што ёсць на Зямлі — усё яму.

Вайна — трагедыя для кожнага беларуса, бо загінуў кожны трэці наш суайчыннік. Мы, сучаснікі, сёння павінны помніць сваё гістарычнае мінулае і цаніць мірнае і шчаслівае жыццё. Будзе жыць памяць — не паўторыцца той жах, які перажылі нашы продкі.

Все новости

Комментарии:

Оставлять комментарии могут только авторизованные посетители.

Телефоны: 8-01563-34-5-92, 8-01563-34-5-85

Email: dtshhv@grodno-region.by

Электронный дневник в Беларуси